Vinicius Junior është dënuar me dy ndeshje moslojë në La Liga pas kartonit të kuq që mori në ndeshje ndaj Valencias pasi e goditi në kokë portierin vendas.

Një ditë para ndeshjes në Superkupën e Spanjës ndaj Mallorcas, trajneri Carlo Ancelotti përveç takimit ka folur edhe për suspendimin e Vinit në La Liga, shkruan Arbresh.info.

Ai e quajti të padrejtë këtë vendim.

“Ndalimi me dy ndeshje për Vinin është i padrejtë. I dëgjoj të gjitha ofendimet që i bëhen dhe çfarë pëson… nuk është e drejtë”.

“Jam lodhur kur dëgjoj njerëzit të flasin për sjelljen e Vinit, ata i harrojnë të gjitha ofendimet, abuzimet dhe të tjerat që i ndodhin”, u shpreh Carlo Ancelotti.

Fatmirësisht trajneri italian, brazilianin do ta ketë të gatshëm për ndeshjen e nesërme dhe potencialisht finalen e Superkupës në qoftë se Reali e arrin, pasi Vini nuk ka marrë dënim më të ashpër dhe do mungojë vetëm në dy sfidat e ardhshme në La Liga.